Астана қаласында бокстан қыздар арасындағы Қазақстан Республикасы чемпионаты басталды. Жарыста еліміздің 14 өңірінен 90-ға жуық боксшы қыздар бақ сынайды.
Елорда төріндегі ел біріншілігіне әлем чемпиондары – Назым Қызайбай, Дина Жоламан, Валентина Хальзова және Ләззат Күнгейбаева да қатысады. Сондай-ақ Рио олимпиадасының қатысушылары – Жайна Шекербекова мен Дариға Шәкімова да жарыс жолына шығады. Әдеттегідей, чемпионаттың қортындысы бойынша ұлттық команданың жаңа құрамы қалыптасады. 2020 жылы Токиода өтетін олимпиаданың аясында бапкерлер құрамы «олимпиадалық» өлшеулі салмақ дәрежелеріне – 51, 60 және 75 келіге ерекше мән береді.
Ел чемпионатының финалдық кездесулері 8 мамыр күні өтеді.
Айта кетейік, бұл күндері Ташкентте бокстан ерлер арасында Азия чемпионаты өтуде. 8 қазақ боксшысы жартылай финалға шықты.