16 қыркүйек күні (Астана уақытымен 17 қыркүйек күні таңда) қазақстандық боксшы Геннадий Головкин мен мексикалық Сауль Канело Альварес жұдырықтасады. Бұл кездесуді асыға күтіп жүрген спортсүйер қауымның қарасы көп.
Қос боксшы арасындағы бокс кеші НВО арнасы арқылы PPV жүйесі бойынша ақылы түрде таратылатын болады. Инсайдерлік дереккөздер бойынша ақылы көрсетілімнің бағасы 75 долларды құрайды екен.
Геннадий Головкин PPV жүйесі негізінде үшінші жекпе-жек өткізгелі жатыр. Осыған дейінгі Дэниэль Джейкобс пен Давид Лемьеге қарсы жекпе-жектерінде көрсетілім 50-55 доллар шамасында сатылған болатын. Бұл жолғы кездесуі ішіндегі ең қымбаты болмақ.
Осыған дейін Канелоның промоутері Оскар де ла Хойя бұл жекпе-жектің тікелей көрсетілімін 3 миллионға жуық көрермен сатып алады деген еді. Бұл жоспар орындалып жатса, Флойд Мейвезер мен Мэнни Пакьяо кездесуінен кейінгі PPV жүйесінде ең көп табысқа кенелген бокс кеші болмақ.
Жекпе-жектің билеттері 22 маусым күні-ақ сатылымға шыққан. Бағасы 300 доллардан басталып, 5000 долларға дейін жетеді. FightSpace жобасының негізін қалаушы Григорий Странгриттің айтуы бойынша, ұйымдастырушылар билеттің өзінен 20 миллион доллар көлемінде табыс түсіретін болады.