Бокстан Таиланд астанасы Бангкокта өтіп жатқан Азия чемпионатының финалында Қазақстан құрамасының қоржыны 1 алтын 1 күміс жүлдемен толықты. Осыған дейін Қайрат Ералиев қола жүлдеге ие болған еді.
52 келі салмақ дәрежесінде Олжас Сәттібаев Азия чемпионы атанды. Отандасымыз финалда өзбек боксшысы Шахобидин Зойровты 3:0 есебімен жеңді. Қарсыласының осал тұсын сәтті пайдалана білген Олжас Сәттібаев ширақ өнер көрсетті.
60 келіге дейінгі салмақта финалға шыққан Закир Сафиуллин күміс жүлдені қанағат тұтты. «Astana Arlans» клубының боксшысы барын сала жұдырықтасқанмен, төрешілер моңғол Дорьнямбуу Отгондалайды жеңімпаз ретінде таныды.
Алдағы уақытта Данияр Елеусінов, Әділбек Ниязымбетов, Иван Дычко мен Василий Левит алтынға таласатын болады.