Орта салмақтағы WBA және IBO тұжырымдары бойынша әлем чемпионы қазақстандық боксшы Геннадий Головкин мен чемпиондық белбеулерге үміткер ганалық Осумана Адама арасында өткен кездесудегі қарсыластардың бір-біріне жұмсаған соққыларының статистикасы белгілі болды, деп хабарлайды Vesti.kz тілшісі.
Аталған кездесу ақпанның 1-інен 2-сіне қараған түні Монакода өтіп, жекпе-жек қорытындысы бойынша Головкин жетінші раундта техникалық нокаутпен жеңіске жеткен еді. Осылайша, Головкин өзінің 29-шы кездесуіндегі 29-шы жеңісіне жетті (оның 26-сы нокаут) және қатарынан 16 мәрте уақытынан бұрын жеңіс тұғырына көтерілді. Кейін хабарланғандай, қазақстандық боксшы қазіргі таңдағы барлық салмақтағы әлем чемпиондары арасында үздік нокаутшы деп танылды.
Compubox/BoxingScene мәліметінше, жеті раунд ішінде Головкин қарсыласына барлығы 422 соққы жұмсап, оның 128-ін дәл көздеген. Джебтер (негізгі соққылардың алдында алдыңғы қолмен жасалатын орташа деңгейде соққы) бойынша 183-те 46, ал хуктарға (үлкен күшпен жұмсалатын негізгі соққы) келсек есеп – 239-ға 82. Адама болса жұмсаған джебтер бойынша алға шыққан – 228. Алайда олардың дәлдігі төмен шыққан – 17. Айта кетейік, кездесу барысында Головкин қарсыласын үш рет нокдаунға түсіріп үлгерді.
Жұмсалған/дәл тиген соққылардың толық статистикасымен (Landed – дәл тиген соққылар, thrown – жұмсалған, power punches - ауыр, яғни негізгі соққылар) келесі кестеден таныса аласыз:
Дайындаған: Болат Қосмағамбет
Сурет: Compubox/BoxingScene