Лондон Олимпиадасының жеңімпазы, боксшы Серік Сәпиев мансабын қазақстандық "Астана Арланс" кәсіпқой клубында жалғастыруы мүмкін, деп хабарлайды Қазақстан спорт порталы.
Елордада аяқталған "Астана Арландары" пен "Американдық нокаутшылар" арасындағы кездесуден соң, осы жаңалық жөнінде Серіктің өзі: "Мен қазір Олимпиада ойындарынан кейін өзімді физикалық және психологиялық тұрғыдан қалпыма келтіріп жатырмын. Жақын арада "Арландардың" құрамына кіруімді жоққа шығара алмаймын", деді. Ол сонымен бірге, өзін "Арландар" қатарына қосылса, капитан ретінде де шаршы алаңға шығуы мүмкін екенін айтқан екен.
Естеріңізге сала кетсек, сенбі күні "Астана Арландары" американдық бокс клубын 5:0 есебімен ұтқан болатын.
Осыған дейін, Вэл Баркер Кубогының иегері бокстан кеткен жағдайда, өзін мемлекеттік қызмет саласынан көргісі келетінін айтқан еді.
Дайындаған: Болат Қосмағамбет
сурет: z001.kz