Қазақстандық бокссүйер қауым жеңіл салмақта WBA (Super) нұсқасы бойынша әлем чемпионы атағына ие отандасымыз Жанат Жақиянов пен британдық боксшы Райан Барнетт арасындағы жекпе-жекті тікелей эфирде көре алады. Бұл туралы «Қазақстан» РТРК» АҚ басшысы Ерлан Қарин facebook желісіндегі парақшасында жазды.
- Бокс жанкүйерлері үшін!!!!! 21-қазаннан 22-ші қазанға қараған түні бокс жанкүйерлері «QAZSPORT» арнасынан тікелей эфирде қазақстандық боксшы Жанат Жақияновтың қатысуымен кәсіпқой бокс кешін тамашалай алады. Ирландияның Белфаст қаласында ең басты жекпе-жекте WBA нұсқасы бойынша жеңіл салмақтағы чемпион Жанат Жақиянов (27 жеңіс, 18 нокаут, 1 жеңіліс) және IBF нұсқасы бойынша чемпион солтүстік ирландиялық Райан Барнетт (17 жеңіс, 9 нокаут, жеңіліс жоқ) шығатын болады. Жақиянов әлемдік бокс рейтингінде 12-ші орында болса, Бернетт–5-ші орында. Жанат WBA белбеуін 2017 жылдың ақпанында алды, ал Барнетт маусым айында ие болған еді. Бұл жекпе-жекті асыға күтеміз, - деп жазды.
Айта кетейік, Жақиянов пен Барнетт арасындағы кездесу 21 қазан күні Солтүстік Ирландия елінің астанасы Белфасттағы "SSE Arena" спорт кешенінде өтеді. АҚШ жерінде бұл кездесуді НВО арнасы көрсетеді.