Қазақстандық зілтемірші Анна Нурмухамбетова допинг ережелерін бұзды деп айыпталуда. Қазақстанның ауыр атлетика федерациясы 2012 жылғы Олимпиаданың жүлдегерін спорттан уақытша шеттетті.
Биылғы жылдың тамыз айында Талдықорған қаласында өткен Спартакиада ойындарында 81 килоға дейін салмақ дәрежесінде бақ сынап, алтыншы орын алған. Зілтеміршінің жарыс кезінде тапсырған қан сынамасынан тыйым салынған "Оралтуринабол" препараты табылған.
Қазіргі таңда спортшының ісі бойынша тергеп-тексеру жүргізіліп жатыр. Егер Анна Нурмухамбетованың допинг қабылдағаны расталса ол 4 жылға спорттан шеттетілуі мүмкін.
Бұған дейін Қазақстанның допингке қарсы орталығы биыл WADA ережесін бұзған 5 зілтемірші мен олардың жаттықтырушыларын спорттан шеттеткен болатын.
24-31 наурыз күндері Қызылорда қаласында өткен 20 жасқа дейінгі қыздар және жасөспірімдер арасындағы Қазақстан чемпионаты кезінде спортшыларға допинг тексеріс жүргізілген. Жарыста топ жарған Асылжан Бектай (81 кг), Әлішер Сейтқазы (102 кг), Гүлдана Жүніс (64 кг) және Аружан Көлбай (71 кг), сондай-ақ күміс жүлдегер Ерасыл Кеңесбаевтің (96 кг) қан сынамасынан тыйым салынған препараттың ізі табылған.
Қазақстанның допингке қарсы орталығы жанындағы WADA тәуелсіз комиссиясы тыйым салынған препаратты қолданған бес спортшыны екі жылға, ал олардың жаттықтырушылары Талғат Әбен мен Айбол Көлбаевты төрт жылға шеттетті.
Айта кетейік, күні кеше ҚР Президенті Қасым-Жомарт Тоқаев "ҚР Спорт және дене шынықтыру туралы кейбір заңнамалық актілеріне өзгертулер мен толықтырулар туралы" заңға қол қойды. Заң допингке қарсы ережелерді бұзғаны үшін жауапкершілікті қатаңдатуға, Ұлттық допингке қарсы ұйымның мәртебесін күшейтуге бағытталған.
Қолданыстағы заңнамаға допингке қарсы ережелерді бұзғаны үшін жауапкершілікті қатаңдату бойынша өзгерістер мен толықтырулар енгізу, атап айтқанда спортшыға допинг тағайындаған адамдарға қатысты әкімшілік жауапкершілікті енгізу қажеттілігі туындады, ол 200 айлық есептік көрсеткіш мөлшерінде айыппұл түрінде жазаны көздейді.