Швейцарияның Ньон қаласында футболдан Еуропа лигасы іріктеу кезеңінің жеребесі тартылып, қазақстандық командалардың қарсыластары белгілі болды.
Алматының "Қайрат" футбол клубы Еуропа лигасының бірінші кезеңінде Литваның "Атлантас" командасымен кездесетін болды. Командалар арасындағы бірінші ойын 28 маусым күні Алматыда, 6 шілде күні Клапейд қаласында өтеді.
Шымкенттің "Ордабасы" футбол клубына Боснияның "Широки Бриег" командасы қарсылас атанды. Бірінші ойын – Шымкентте, қарымта кездесу 6 шілде күні Боснияда өтеді.
"Широки Бриег" командасы қазақстандық жанкүйерлер үшін таңсық емес. 2013 жылы Еуропа лигасында Павлодардың "Ертіс" командасына қарсылас атанған."Ертіс" өз алаңында 3:2 есебімен ұтып, қарымта кездесуде 2:0 есебімен жол беріп алған болатын.
Биылғы маусымда "Ертіске" Болгарияның "Дунав" командасы қарсылас болды. "Ертіс" те бірінші ойынды өз алаңында өткізеді.
"Қайрат" екінші кезеңге өтсе, "Скендербеу" (Албания) - "Сан-Хулиа" (Андорра) командаларының жеңімпазымен кездеседі. "Ордабасы" - "Широки Бриег" командаларының жеңімпазына екінші кезеңде Шотландияның "Абердин" командасы қарсылас атанады. Ал "Ертіс" "Дунавтан" (Болгария) басым түссе, "Црвена Звезда" (Сербия) - "Флориана" (Мальта) командаларының үздігімен кездеседі.
Айта кетейік, осыған дейін Чемпиондар лигасының екінші іріктеу кезеңінде "Астанаға" Латвияның "Спартак Юрмала" командасы қарсылас атанған еді.