Қазақстандық кәсіпқой боксшы Айдар Шәрібаев екінші жартылай жеңіл салмақ дәрежесінде WBA Inter-Continental чемпиондық белбеуіне таласады. Жекпе-жек 6 сәуір күні Лос-Анджелесте өтеді.
Айдар чемпиондық белбеу сарапқа салынатын жекпе-жекте мексикалық Марио Тинокомен жұдырықтасады. Қарсыласы Әлемдік рейтингте 169-шы орында тұр. Кәсіпқой бокста 2010 жылдан бері 25 рет шаршы алаңға шығып, 16 рет жеңіске жеткен. 12 кездесуінде қарсыласын нокаутпен ұтқан. Алайда, бес жекпе-жекте жеңіліп, төртеуінде тең түскен.
Кәсіпқой бокста жеті жекпе-жек өткізіп, жетеуінде де жеңіске жеткен, оның алтауында қарсыласын құлатқан Айдар Шәрібаев бұл күндері дайындығын АҚШ-тың Майами қаласында пысықтап жатыр.
Лос-Анджелестегі кәсіпқой бокс кешін әйгілі "Golden Boy" промоутерлік компаниясы ұйымдастырып отыр. Айдардың айқасынан бөлек бұл кеште тағы төрт жекпе-жек өтеді.