2016 жылғы «Africa Eco Race» халықаралық ралли жарысы қазақстандық экипаждардың тарихи жеңісімен аяқталды. Қанат Шағыров пен Виталий Евтехов жеңіс тұғырынан көрінді.
Қазақстандық экипаждар соңғы кезеңді жеңіспен аяқтай алмағанмен, жалпы есепте жеңісті уыстан шығарған жоқ. Екінші орын алған француз экипаждары Паскаль Томас пен Паскаль Ларока қазақстандықтардан 24,48 минутқа қалып қойған. Үштікті де француз экипаждары Матье Серрадори мен Дидье Акет түйіндеді.
«Africa Eco Race-2016» ралли додасының үздік ондығына Юрий Сазонов пен Алексей Кузьмич де кірді. Көшбасшыдан 4 сағат 18 минут 26 секундқа жеңілген олар сегізінші орыннан көрінді. Ал жарысқа алғаш рет қатысқан Ерден Шағыров пен Арслан Сахимов қорытынды кестеде 27-ші орынды қанағат тұтты.