Футболдан Қазақстан ұлттық құрамасы қараша айында әйгілі Аргентина құрамасымен жолдастық кездесу өткізуі мүмкін. Бұл туралы Қазақстан футбол федерациясының спорттық директоры Игорь Утробин хабарлады – деп жазады Vesti.kz.
- Біз аргентиналықтар тарапымен келіссөздер жүргізудеміз. Әрине, бұл келіссөздер оңай емес. Бірақ 14 қарашаға дейін көп уақыт қалған жоқ. Қазіргі таңда қаржылық жағын шешіп алуымыз керек. 40 % қаржы көлемі Қазақстан футбол федерациясы тарапынан болса, 60 %-на демеушілермен келіссөздер жүргізудеміз.
Лионель Месси, Серхио Агуэро, Анхел Ди Мария, Хавьер Маскерано секілді атақты ойыншылардың келуі – қазақ футболы тарихындағы айтулы оқиғалардың бірі болады деп ойлаймын. Егер қаржылай жағы оң шешімі табылса, аргентиналықтар бірінші құраммен келетін болады, - деді Утробин.
Айта кетейік, 11 қараша күні Аргентина құрамасы Мәскеуде Ресей құрамасымен жолдастық кездесу өткізеді.