9 қыркүйек күні Астанада кәсіпқой бокс кеші өтеді. Кештің басты жекпе-жегінде Қанат Ислам мен канадалық боксшы Брэндон Кук жұдырықтасады. Бүгін қос боксшы баспасөз мәслихатына қатысып, көз арбасты.
Қанат Ислам мен Брэндон Кук бірінші орта салмақта WBO NABO және WBA Inter-Continental чемпиондық атақтарына таласады.
- Астанада өтетін бокс кешіне қатысуға шақырғанына алғысымды білдіремін. Сіздердің елде таңғажайып адамдар тұрады екен. Жекпе-жекке қатысты айтар болсам, мен бірінші рет өзге елде жекпе-жек өткізгелі тұрмын. 9 қыркүйекте не болатынын көреміз. Бұл - бокс. Мен кездесуге дайынмын, - деді Брэндон Кук.
9 қыркүйектегі бокс кеші Астанадағы республикалық "Сарыарқа" велотрегі кешенінде өтеді. Сондай-ақ бұл бокс кешінің андеркардында 8 қазақстандық боксшы өнер көрсетеді. Олар — Жанқош Тұраров (21-0, 15 КО), Жәнібек Әлімханұлы (1-0, 1 КО), Мейірім Нұрсұлтанов (3-0, 2 КО), Руслан Мырсатаев (3-0, 3 КО), Әли Ахмедов (7-0,5 КО), Айдос Ербосынұлы (6-0, 6 КО), Димаш Ниязов (11-0-3, 5 КО) және Нұрсұлтан Жаңабаев (2-0, 1 КО). Барлық боксшыларымыз осы уақытқа дейін бірде-бір рет жеңілмеген.