Олимпиада чемпионы Данияр Елеусінов (12-0, 7 КО) жартылай орта салмақта (66,7 келіге дейін) WBC чемпионы америкалық Марио Барриосты ((29-2-1, 18 КО) жұдырықтасуға шақырды, - деп хабарлайды msports.kz сайты.
"Өткен демалыста WBC нұсқасы бойынша әлем чемпионы Марио Барриостың әлсіз өнерін көрдім. Абель Рамоспен тең түсті, сонымен қатар ол жекпе-жектің ортасында нокдаун алды. Марио, мен сені жеңіп шығатыныма сенімдімін. Кел, жұдырықтасайық. Қай жерде болса да, кез келген уақытта. Олимпиада чемпионы мен WBC чемпионы. Кел, жанкүйерлерімізге нағыз шоу көрсетейік!" - деп жазды Елеусінов Instagram-парақшасында.
Данияр Елеусінов қыркүйек айында Алматыда жекпе-жекке шықты. Филиппиндік Джо Нойнайды (23-5-2, 11 КО) бесінші раундта уақытынан бұрын жеңіп шықты. Бұл жеңіс Елеусіновке WBC Peace нұсқасы бойынша екінші дәрежелі чемпион атағын иеленуге және BoxRec рейтингінің ТОП-15-тігіне енуге мүмкіндік берді.