Алматыдағы кәсіпқой бокс кешінің екінші жұбында Айдар Шәрібаев пен испан боксшысы Хуан "Венено" Окура жұдырықтасты. Кәсіпқой бокстағы төртінші жекпе-жегіне шыққан қазақстандық боксшы қарсыласын төрешілер шешімімен жеңіп шықты.
Айдар Шәрібаев пен Хуан "Венено" Окура арасындағы жекпе-жек тартысқа толы өтті. Отандасымыз қорғана жүріп жұдырықтасты. Әсіресе қарсыласының шабуылға шыққанын күтіп, соққы жұмсаумен болды. Ал испан боксшысының соққылары ауа қармап жатты. Нәтижесінде 6 раундқа жоспарланған жекпе-жек соңына дейін өтіп, жеңімпазды төрешілер айқындады.
Айдардың қарсыласы осал емес болатын. Испандық осыған дейін кәсіпқой бокста 18 жекпе-жек өткізген тәжірибелі боксшы. 11 кездесуінде жеңіске жетіп, 1 жекпе-жегін тең аяқтаған. Қалған кездесулерінде жеңілген.