Жаңа ғана барлық салмақ дәрежесі бойынша әлемнің ең үздік боксшысы саналатын америкалық Флойд Мейвезер чемпиондық кездесу барысында аргентиналық Маркос Майдананы ұпай санымен ұтып, өзінің 46-шы жеңісіне қол жеткізді (26-сы нокаутпен). Бокс кеші АҚШ-тың Лас-Вегас қаласындағы (Невада штаты) MGM Grand аренада өткен еді.
Сонымен спорттық мансабында бірде-бір рет жеңілмеген 37 жастағы Флойд Мейвезер әлемдегі ең үздік былғары қолғап шебері екендігін тағы да әлемге паш етті. Ал Маркос Майдана болса шаршы алаңда осымен 4-ші рет жеңіліске ұшарады (35 рет жеңіске жеткен, 31-і нокаутпен).
Бүгінгі болған бокс кеші үшін Флойд Мейвезердің қалтасы 32 миллион АҚШ долларына толса, Майдана тек 1,5 миллион долларды қанағат тұтпақ. Мейвезерге одан бөлек жекпе-жекті АҚШ көрермендеріне ақылы түрде таратқан Showtime телеарнасының сыйақысы да қосылатынын айта кетейік.
Дайындаған: Болат Қосмағамбет
Сурет: gorodokboxing.com