![Анна Данилина Румыниядағы турнирдің чемпионы атанды](/userdata/news/news_112648/image_l.png)
Қазақстанның жұптық сындағы бірінші, әлемнің 48-ракеткасы Анна Данилина Яссыдағы (Румыния) WTA 250 турнирінің чемпионы атанды, - деп хабарлайды Massaget.kz тілшісі.
Қазақстандық теннисші ресейлік Ирина Хромачевамен бірге жарыстың 1-ракеткалары болып тіркелген еді. Қазақстандық-ресейлік жұп финалда доданың 2-ракеткалары, ресейліктер Александра Панова – Яна Сизиковамен бас жүлдені сарапқа салды.
Бірінші партияда Данилина – Хромачева брейк жасап, есепті 5:3-ке жеткізді. Бұдан кейін ресейлік дуэт қайыра брейк жасады. Дегенмен Анна мен Ирина сетті тағы бір брейкпен түйіндеді – 6:4.
Екінші сетте қазақстандық-ресейлік жұп 3:0 есебімен алға шықты. Ресейліктер есепті қысқартқанымен, Анна Данилина – Ирина Хромачева матчты жеңіспен аяқтады – 6:2.
Бір сағат 17 минутқа созылған бәсеке барысында екеуі 13 брейк-пойнттың бесеуін мүлт жібермеді.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!