Футболдан Еуропа чемпионатының "D" тобындағы ойындар аяқталды. Соңғы турда Австрия Нидерланд құрамасын 3:2 есебімен ұтса, Франция Польшамен тең ойнады.
Жарыстың фавориті саналған француздар өз тобында екінші орын алды. 6 ұпай жинаған Австрия құрамасы 1-орын алып, сенсация жасады. Соңғы турда олар Нидерланд құрамасын 3:2 есебімен ұтты.
Берлинде өткен ойында 5 гол соғылды. Австрия құрамасы сапында Шмидт пен Забитцер бір-бір голдан соқты. Ал ең бірінші гол автогол болды. Оны Нидерланд құрамасының ойыншысы Мален өз қақпасына соғып алды.
Нидерланд құрамасы сапында Гакпо мен Депай мергендігімен көзге түсті.
Франция мен Польша 1:1 есебімен тең ойнады. Екі гол да екінші таймда пенальтиден соғылды. Алдымен 56-минутта Мбаппе пенальтиді сәтті орындаса, 79-минутта Левандовский 11 метрлік соққыдан есепті теңестірді.
Маскамен ойынға шыққан Килиан Еуропа чемпионатындағы алғашқы голын соқты.