Ярослава Шведова жұптық кезеңде «US Open» финалына шықты

Ярослава Шведова мен Кейси Деллакуа жартылай финалда неміс қызы Анна-Лена Гренефельд пен америкалық Коко Вандевеге жұбын жеңді. Бірінші сетте қарсыластарына 6:7 есебімен есе жібергенмен, екінші және үшінші сетте 7:5, 7:5 нәтижелерімен басым түсті. Корттағы кездесу 2 сағат 49 минутқа созылды.

Қазақстандық және аустралиялық теннисшілер финалда швейцариялық Мартина Хингс пен үндістандық Саня Мирзаға қарсы ойнайды.

Айта кетейік, Ярослава Шведова 2010 жылы «US Open» турнирінің жұптық кезеңінде Ваней Кингпен бірге чемпион атанған болатын. Ал араға бір жыл сала финалда жеңіліс тапқан-ды. Cондай-ақ, бүгін әйелдер арасындағы жекелей кезеңде басты фавориттер Серена Уильямс пен Симон Халеп жарысты жартылай финалда аяқтап, спорт жанкүйерлері күтпеген оқиға орын алды.