Тоғызқұмалақтан компьютер бағдарламалары бойынша әлем чемпионаты аяқталды

Дүниежүзілік тоғызқұмалақ федерациясы және тоғызқұмалақтан Чехия Республикасының федерациясы халықаралық деңгейде тоғызқұмалақ спорт түрін насихаттау үшін ірі жобаларды іске асырып келеді. Тоғызқұмалақты халықаралық деңгейде таныту үшін зияткерлік ойындарды жазатын әлемнің үздік бағдарламашылары арасында да біріншіліктер ұйымдастыруда. Биыл өткен әлем чемпионаты да осы мақсатта ұйымдастырылып, жеңімпаздарын анықтады.

Тоғызқұмалақтан компьютер бағдарламалары бойынша өткен ІІІ әлем чемпионатында Ернар Шамбаев, Диана Кенина және Серік Ақтаевтың бірлесе жасаған бағдарламасы үздік деп танылды. ІІ орынды Қырғызстан елінің бағдарламашылары иеленсе, ІІІ орынға Чехия Республикасының авторлары дайындаған бағдарламасы лайық деп танылды.