Әйгілі португалдық футболшы Криштиану Роналду Мадридтің Реалынан Туриннің Ювентус клубына ауысты. Бұл туралы италиялық ұжымның ресми сайты хабарлады. Бірер сағат бұрын корольдік клуб Роналдумен қош айтысқан болатын. 9 жыл ойнаған футболшыға алғысын білдіріп, алдағы спорттық мансабына сәттілік тілеген-ді. Португалдық сұрмерген Ювентус командасымен төртжылдық келісімшартқа қол қойған. Жылына 30 миллион еуро көлемінде еңбекақы алады. Ювентус футболшының трансферлік құнына 100 миллион еуро шығындаған. Оны корольдік клубқа 2 жыл ішінде төлейтін болады. Сондай-ақ тағы бұрынғы командасына 12 миллион еуро береді. Айта кетейік, Криштиану Роналду Реал футбол клубы сапында 438 ойынға қатысып, 451 гол соғып, команда тарихындағы ең үздік сұрмерген атанды.