Нұрмахан Тінәлиев: “Жақын арада үлкен спорттан кететін ойым жоқ”
- АҚШ-та өткен жарысқа қандай көңіл-күймен бардыңыз? Жалпы ол турнирге дайындығыңыз қалай болды?
- Жыл енді басталып келе жатыр. Сондықтан да мен АҚШ жеріне физикалық күшім енді-енді қалыпқа келе бастағанда жол тартып кеттім. Біз Олимпиададан кейін біраз демалдық. Бірақ мен дұрыстап демалдым деп айта алмаймын. Өйткені, жарақатым болды. Соны емдетіп жүрдім. Жыл басындағы оқу-жаттығу жиындарында тек физикалық күшімді қалыпқа келтіру үшін ғана дайындалдым. Бапкерлер мені спортзалға кіргізбеді. Бозкілемге тек Америка жеріндегі жаттығуларда ғана шықтым. Кілемге шығып, қарсыласпен алысуды әбден сағынып қалыппын.
- Сіз грек-рим күресінің аса ауыр салмақ дәрежесінде белдесесіз. Ауыр салмақта өзіңізге осы уақытқа дейін ыңғайыз қарсылас атанған балуандар бар ма?
- Білесіз бе, мен қарсыластарымды ыңғайлы немесе ыңғайсыз деп бөлмеймін. Жеребе кіммен жолықтырады, сонымен белдесемін. Әр елдің балуандарымен белдескенде өзіңнің әлсіз тұстарың мен өзіңнің «көзіріңді» анықтап аласың. Сол арқылы келесі белдесулерге де дайындық жүргізетін боласың.
- Спортшылар ылғи да үйінен жырақта, оқу-жаттығу жиындарында болады. Тіпті, кейбіреулері үйін 4-5 айлап көрмейді. Сіздің бос уақытыңыз бола ма?
- Менің өзге спортшылардан айырмашылығым жоқ десе де болады. Сондықтан да менің де бос уақытым бола бермейді. Өзің айтып өткендей, оқу-жаттығу жиындарымен шет елге көп шығып кетеміз. Ол бітсе, жарыс басталады. Міне, осылай спортшының күні өте береді. Жарыстан кейін бір, екі күн ғана демалуға рұқсат аламыз. Ол уақыт үйге барып-қайтуға да жетпей қалады. Анамды кейде ұзақ уақыт көрмейтін кездер болады. Бірақ, амал қанша, спорттың аты спорт! Жақсылап дайындалмасаң, нәтиже көрсете алмайсың.
- Нұрмахан, ұлттық құрама сапында өнер көрсетіп келе жатқаныңызға біршама уақыт болды. Артыңыздан ізбасар інілеріңіз де өсіп келеді. Спорттан кету туралы ой сізде болмай ма?
- Енді ғана өзімнің бабыма келіп жатырмын. Сондықтан да жақын арада үлкен спорттан кететін ойым жоқ. Ия, талантты балуандар өсіп келе жатқанынан да хабарым бар. Бірақ, елімізде аса ауыр салмақта бірінші нөмір менде ғой. Егер менің артымнан өсіп келе жатқан жігіттер мені бозкілемде тізе бүктірсе, орнымды беремін. Бірақ, қайталап айтамын, жақын арада үлкен спорттан кетпеймін!
- Әңгімеңізге рақмет!
Cұхбаттасқан: Уалихан Қосанбай
Сурет: alaman.kz