Монте-Карло: Головкин - Адама. Бүгін

Кездесу Монако князьдігінің Монте-Карло ойын-сауық ауданында өтпек. Ал еліміздің бокс сүйер жанкүйерлері үшін жерлесіміздің жекпе-жегін отандық қос телеарна «Қазақстан» мен «Kazsport» тікелей эфирден көрсетеді. Гена мен Осумана жекпе-жегі бүгінгі бокс кешінің негізгі оқиғасы болмақ. Жоспар бойынша аталған боксшылар рингке ақпанның 1-інен 2-сіне қараған түні сағат 2 мен 3 аралығында көтеріледі деп күтілуде.

KazSport арнасы Астана уақытымен сағат 22:30-да шымылдығын түретін андеркарттан (негізгі кездесу алдындағы қыздырыну жекпе-жектері) бастап кештің аяғына дейін тікелей трансляция жүргізсе, ал «Қазақстан» Ұлттық арнасы Монакоға Астана уақытымен түңғі сағат 2:30-дың шамасында қосылып, тек жерлесіміздің қатысуымен өтетін негізгі кездесуді ғана тікелей эфирден таратады. 

Массагет порталы да кездесудің қалай аяқталғанын ең бірінші боп сіздермен бөлісетін болады.  

Айта кетейік, осыған дейін Монакода спортшылардың салмағын анықтау рәсімі өткен болатын. Нәтижесінде қос боксшы да 72,2 келі салмақ дәрежесін көрсетіп (159,2 фунт), орта салмақтан (72,574 келі немесе 160 фунт) ауытқымағандығына көпшіліктің көзін жеткізді.   

Қазақстандық боксшы үшін бұл кештегі кездесу өз мансабындағы 29-шы саналады. Айта кетейік, Гена осыған дейінгі 28 кездесуінде жеңіске жеткен болатын (оның 25-і уақытынан бұрын аяқталды). Ал қарсыласы ганалық Осумана Адама 25 рет рингке көтеріліп, оның 22-сінде жеңіске жеткен (16 нокаут).

Естеріңізге сала кетсек, осыған дейінгі кездесуінде Головкин америкалық Кертис Стивенсті сегізінші раундтан кейін техникалық нокаутпен жеңген болатын. Геннадийдің тағы да бір қарсыласы британиялық Мэттью Маклин қазақстандық боксшымен болған кездесуінің салдарын баяндап және де Осуманаға алдағы кездесуде жеңіске жетуі үшін жасауы тиіс бірер кеңесін айтқан еді.  

Дайындаған: Болат Қосмағамбет

Сурет: vesti.kz