Қазақстандық кәсіпқой боксшы Садриддин Ахмедов мексикалық Хесус Хавьер Мендозаны 57 секундта нокаутқа түсірді. Канаданың Монреаль қаласында өткен бокс кешінде шаршы алаңға шыққан боксшылардың жекпе-жегі 6 раундқа жоспарланған болатын. Садриддин қарсыласын 1 минутқа жеткізбей техникалық нокаутпен жеңіп шықты. 20 жастағы қазақстандық кәсіпқой боксшы мансабындағы төртінші жеңісіне қол жеткізді. Төрт кездесуінде де қарсыласын уақытынан бұрын ұтып шықты. Кәсіпқой боксқа осы жылы қадам басқан болатын. Садриддин Ахмедов әуесқой деңгейде 2016 жылы әлем чемпионы атанған боксшы. Кәсіпқой бокстағы төрт кездесуін де Канада жерінде өткізді. Eye of the Tiger Management промоутерлік компаниясымен келісімшартқа қол қойған. Бұл компанияда Батыр Жүкембаев(14-0, 12 КО),Абылайхан Хұсаинов(9-0, 6 КО) жәнеНұрзат Сабыров(7-0, 6 КО) сынды қазақ боксшылары бар. Монреальдағы бокс кешінде Абылайхан Хұсайнов та шаршы алаңға шықты. 8 раундқа жоспарланған жекпе-жекте мексикалық Хесус Лагунаны 2:54 минутта нокаутқа түсірді.