Испаниялық Карлос Феррер "Қайраттың" бас бапкері болып тағайындалды

Феррердің тағайындалғаны туралы клуб басшысы Қайрат Боранбаев өзінің Instagram парақшасында хабарлады. Испаниялық маман "Қайраттың" тізгінін маусымның соңына дейін ұстайтын болады.

"Біздің клуб Карлоспен біраз уақыт бойы жақсы қарым-қатынаста болып келді. Негізі біз оны жылдың соңында командамызға шақырғымыз келген. Бірақ клубта болған соңғы жағдайларға байланысты біз бұл маманды қазір шақыртуға мәжбүр болдық. Келісімшарт жыл соңына дейін жасалды.

Біздің жағдайымызды түсініп, Феррерді Қазақстан жастар құрамасында қызметінен босатып, бізге көмектескені үшін Қазақстан футбол федерациясына алғыс біледіреміз. Барлығына сәттілік тілеймін!", - деді Боранбаев.

42 жастағы Феррер Қазақстанда 2015 жылдан бері қызмет етіп келеді. Ол шымкенттегі "Оңтүстік" академиясында екі жыл жұмыс істеп, Қазақстан жасөспірімдер құрамасын баптап келген еді. Қазақстанға дейін ол Испания, Гонконг және Польшада жастар мен жасөспірімдер академияларында жұмыс істеген.

Испаниялық маман мансап жолында тек бір рет қана кәсіпқой футбол клубының бапкері болған. 2015 жылдың қаңтары мен мамыры аралығында "Погонь Седльце" тізгінін ұстап, бар болғаны он кездесу өткізген.

Еске салайық, 21 шілде күні грузин маман Кахабер Цхададзе қызметінен кеткеннен кейін "Қайрат" клубы бас бапкерсіз қалған-тұғын.