Илья Ильин 2015 жылғы әлем чемпионатына қатыспайтын болды

Екі дүркін Олимпиада, төрт дүркін әлем чемпионы атанған отандасымыздың байрақты бәсекеге қатыспауының да себебі жоқ емес. Сыр өңірінің толағайы 2016 жылғы Рио-де-Жанейрода өтетін Олимпиада ойындарын маңызды санап отыр.

- Биыл бір турнирге қатысатыным анық. Тұғырға шығып, өзімнің шама-шарқымды байқап көруім керек. Бірақ, әлем чемпионатына қатыспаймын. Өйткені, екі жылда екі бірдей үлкен турнирге қатысу үшін жақсылап дайындалу қажет. Ал, мен өз күшімді сақтағым келеді. Менің басты мақсатым – Рио-де-Жанейрода өтетін Олимпиада ойындарында алтын алу. Бразилия жерінде жақсы өнер көрсету үшін дайындаламын, - дейді Илья Ильин.

Сонымен қатар, спортшы ауыр атлетикадан бөлек бокспен айналысып жүр екен. Жаттығу жұмыстарында көбірек жүгіруді де баса назарға алыпты.

- Жаттығу жұмыстарыма өзгеріс енгізгенім рас. Жүгіруді қостым. Бұл зілтеміршілер үшін жаңалық деп айтсақ та болады. Күніне 5-6 шақырым жүгіремін. Соңғы кездері бокспен айналысып жүрмін. Біздің командада Рүстем Сыбай жаттығады. Ол бізге бокстың әдістерін үйретіп, жаттықтырушы қызметін атқарады. Соққымды жақсылап қойып алғым келеді. Оның үстіне менің жақын достарым – Серік Сәпиев пен Бақтияр Артаев та боксшылар. Қарағандыда Рой Джонспен жақсы әңгімелестік. Сол жігіттерге қарап боксты да үйренгім келді, - деген.

Айта кетейік, осыған дейін Илья Ильин Лондонға ағылшын тілін үйрену үшін аттанған болатын.

Сурет:time.kz

Оқи отырыңыз

Илья Ильин Лондонда шеберлік сабағын өткізді

Илья Ильин: Ағылшын тілін үйреніп жүрмін

Илья Ильин жаттығу жұмыстарын бастады