Хакерлер ФИФА президентінің туиттеріне шабуыл жасады
Хакерлер Халықаралық футбол федерациясының және осы ұйымның басшы Йозеф Блаттердің Twitter желісіндегі жеке парақшасын Астана уақытымен шамамен 22:00-де бұзған. Блаттердің жеке парақшасында ол парақорлық мәселесіне байланысты жуық арада орнынан өз еркімен кететіндігі туралы хабарлаған. Ал орнына Иордания королінің ұлдарының бірі Әли Бин Әль-Хусейн келетіндігі туралы жазба қалдырып кеткен. Өз кезегінде Әли Бин Әль-Хусейн бүгінге ФИФА ұйымының вице-президенті болып саналады.
Сондай-ақ шабуыл жасағандар ФИФА президентінің атынан 2030 жылы Иордания мемлекеті Әлем чемпионатын лайықты өткізе алатындығы туралы да жазба қалдырған. Ал ФИФА-ның ресми уәкілдері бұл хабардың барлығы да шындыққа жанаспайтыны туралы мәлімдеп отыр.
«Халықаралық футбол федерациясы мен Йозеф Блаттердің кеше кешкілік Twitter парақшасында жарияланған мәліметтері мүлде шындыққа жанаспайды. Мұны осы ұйымға қарсы жаман пиғылдары бар адамдар жасады. Біз осы мәселеге байланысты ФИФА-ның байланыс бөліміне Twitter-де шыққан әр хабарламасын мұқият бақылауға тапсырма бердік. Шабуыл жасаған адамдар жуық арада табылатын болады», - делінген ФИФА-ның ресми сайтында.
Қолда бар мәліметтерге жүгінетін болсақ, шабуыл жасағандар тек Халықаралық футбол федерациясы мен Йозеф Блаттердің жеке парақшасын ғана емес, сонымен қатар 2014 жылғы Бразилияда өтетін Әлем біріншілігінің ресми микроблогын да бұзған екен. Бірақ мұнда хакерлер ешқандай мәлімет қалдырмаған.
Осы оқиғаға байланысты бүгін Syrian Electronic Army атты ұйым "Шабуылды біз жасадық" деп ресми хабар таратып отыр.
Дайындаған: Уалихан Қосанбай
Сурет: media.skynews.com, vesti.kz