Головкиннің жекпе-жегін қайдан көруге болады?

Бокс кеші Нұр-Сұлтан уақытымен таңғы сағат 4.00-де басталады. Головкин мен Шереметаның жекпе-жегінің басталуы таңғы сағат 07.00-ге жоспарланған. Қазақстанда бокс кеші екі телеарнадан тікелей эфирде көрсетіледі. Qazaqstan мен Qazsport арналары тікелей трансляцияны таңғы 04.00-де бастайды. Ал ақылы түрде DAZN платформасынан көруге болады.

Жекпе-жек алдындағы баспасөз мәслихатында Головкин жекпе-жекке дайындық туралы айтты.

"Негізінде, осы жылы болып жатқан оқиғаларды ескере отырып, маған бейімделуге көп уақыт болды. Команданың арқасында біз оқу-жаттығу жиынында жақсы дайындалдық. Өзімді жақсы сезініп тұрмын және жақсы жекпе-жек өткізуге дайынмын деп ойлаймын", - дейді ол.

Камил Шеремета Головкинмен шайқаста украиналық Сергей Деревянченконың тактикасын қолдануды жоспарлап отырғаны белгілі.

"Ол кезде Сергей өте жақсы жекпе-жек өткізді. Мен жекпе-жектің видеосын өте мұқият зерттедім", - дейді Шеремета.

Болжамдарға келетін болсақ, сарапшылар жекпе-жектің қанша уақытқа созылатыны Головкинге байланысты дейді.

19 желтоқсанда АҚШ-тың Флорида штатында Геннадий Головкиннен бөлек Али Ахмедовтың қатысуымен де бокс кеші өтеді. Ол орта салмақтағы IBO тұжырымы бойынша әлем чемпионы атағы үшін эквадорлық Карлос Гонгорамен жұдырықтасады.