Бапкер Роберт Гарсия: "Головкин – Котто үшін аса қауіпті қарсылас"

Гарсияның пікірінше, Коттоға WBA және IBO тұжырымдары бойынша әлем чемпионы саналатын Головкинмен кездесудің еш қажеті жоқ көрінеді.

«Котто 160 фунтта Канеломен кездессе болады, - дейді Гарсия, - Сондай-ақ 160 фунтта кіші Чавеспен жұдырық түйістірсе де жарасады. Бұл тұста Мейвезермен де қарымта жекпе-жек өткізу мүмкіндігі бар. GGG  (Геннадий Головкин)? Жоқ, Коттоға ол тым «үлкен» қарсылас. «Үлкен» дейтін себебім, Головкин - Котто үшін аса қауіпті қарсылас».

Айта кетейік, Роберт Гарсия көпшілікке танымал Брэндон Риос, Нонито Дониэр және Келли Павлик сияқты боксшылардың бапкері саналады.

Мигель Котто және Геннадий Головкин 

Естеріңізге салар болсақ, 8 маусым күні орта салмақтағы чемпиондық кездесу қорытындысы бойынша пуэрто-риколық Мигель Котто аргентиналық Серхио Мартинестен WBC брилиантты белбеуін тартып алған еді. Аталған кездесуді көрермендер арасынан тамашалаған Головкин осыған дейін қос боксшы арасындағы жекпе-жектің жеңімпазымен кездескісі келетінін ашық айтқан болатын. Қазір отандасымыз өзінің 26 шілде күні аустралиялық Дэниэль Гилге қарсы кездесуіне қызу дайындық үстінде.

Дайындаған: Болат Қосмағамбет

Сурет: sports.kz