Әйгілі Джокович қазақстандық теннисшіні әрең жеңді

Новак Джокович пен Михаил Кукушкин арасындағы ойын 4 сағат 56 минутқа созылды. Әйгілі Джокович қазақстандық теннисшіні әрең жеңді деуге де болады. Бірінші сетте қос теннисші де өз геймдерінде қателікке бой алдырған жоқ. Нәтижесінде жеңімпаз тай-брейкте анықталды. Михаил қарсыласын 8:6 есебімен ұтып шықты.

Екінші сетті Михаил Кукушкин қателікпен бастады. Төртінші геймде өз қателігін түзегенмен, тай-брейк сериясында 7:3 есебімен Новак Джоковичтің мысы басым болды.

Үшінші сетті Михаил Кукушкин өте сәтті өткізді. Қарсыласына қарсы екі брейк жасап, бірден 5:2 есебімен алға шықты. Алайда әлемнің бірінші ракеткасы есепті екі геймге дейін қысқарта білді. Қорытындысында 6:4 есебімен қазақстандық теннисші жеңіске жетті.

Соңғы екі сетте серб теннисшісінің жолы болды. Төртінші сетте 6:3 есебімен жеңіске жетсе, бесінші сетте 6:2 есебімен басым түсті. Нәтижесінде Сербия мен Қазақстан құрамалары арасындағы ойында таразы басы теңесті. Алайда шешуші ойында Александр Недовесов пен Виктор Троицкийге есе жіберіп, Қазақстан құрамасы жарыс жолынан шығып қалды.