«Ақтөбе» мен «Ордабасы» Еуропа лигасын бірінші кезеңде аяқтады

Қазақстандық екі клуб Еуропа лигасын бірінші іріктеу кезеңінде аяқтады. Ел сенім артқан «Ақтөбе» өз алаңында Эстонияның «Нымме Калью» клубына бірінші ойында есе жіберген-ді. Қарымта кездесуде де Владимир Газзаев жаттықтыратын клубтың  жолы болмады. Таллинде тең есеп тіркелді. Нәтижесінде «Нымме Калью» екінші іріктеу кезеңіне өтті. Енді эстониялық клуб екінші іріктеу кезеңінде Лихтенштейннің «Вадуц» клубымен кездесетін болады.

Шымкенттік клуб өз алаңында Израильдың «Бейтар» клубымен тең ойнады. Ойында басымдыққа ие болғанмен, есепте басымдыққа ие бола алмаған-ды. Иерусалимде де Виктор Кумыков шәкірттері ширақ қимылдап, шабуылда белсенділік танытқанмен, қорғаушылардың бірнеше қателігі қарсыластардың гол соғуына мүмкіндік сыйлады. Алдымен 17 минутта Омер Ацили есеп ашса, екінші таймда Довев Габбай екінші голдың авторы атанды. Араға 6 минут сала Кирило Петров есепті қысқартқанмен, төреші ысқырығы шалынғанша «Ордабасы» ойыншылары таразы басын теңестіре алмады.

Айта кетейік, осыған дейін Алматының «Қайрат» клубы Еуропа лигасының екінші іріктеу кезеңіне өткен болатын.