US Open. Зарина Диас жұптық сайыстың ширек финалына өтті

Қытайлық теннисші И Фань Сюймен жұп құрған жиырма жастағы қазақ қызы үшінші кезеңде чехиялық Луция Градецкая мен нидерландылық Михаэлла Крайчек жұбын жеңді. Есеп – 7:6 (7:3), 6:2. И Фань Сюй мен Заринаның 1/4 финалдағы қарсыласы Сания Мирза (Үндістан) / Кара Блэк (Зимбабве) – Елена Янкович (Сербия) / Клара Коукалова (Чехия) жұптарының жеңімпазы болады деп күтілуде.

Зарина мен И Фань Сюй екінші кезеңде америкалық Лорен Дэвис пен чехиялық Рената Воракова жұбын 6:3, 7:6 есебімен қапы қалдырған-ды.

Естеріңізге сала кетсек, Зарина Диас US Open турнирінің жекелей сынында үшінші кезеңнен аса алмады. Қазақстанның бірінші ракеткасы бірінші кезеңде ураиналық теннисші Леся Цуренконы 6:1, 6:2 есебімен еш қиындықсыз тізе бүктірген болатын. Ал, екінші кезеңде 15 жасар америкалық теннисші Кэтрин Кэртан Беллиспен жолығып, 6:3, 0:6, 6:2 есебімен басым түсті. Үшінші кезеңде әлемнің он сегізінші ракеткасы саналатын ресейлік теннисші Екатерина Макароваға 2:6, 4:6 есебімен есе жіберді. 

Зарина соңғы жаңартылған WTA рейтингінде 48-нші орында келеді.

Дайындаған: Нұржігіт Айдархан

Сурет: vesti.kz