«Baku Fires» есесін қайтарды

Алғаш болып шаршы алаңға көтерілген Ілияс Сүлейменов бірден қарсыласы Эльвин Мамишзаданың тегеурініне тап болды. «Өз үйім – өлең төсегім» деп көсілген әзірбайжан боксшысын жерлесіміз екінші раундта сабасына түсірген-ді. Соңынан сылбырлық танытқан Ілияс «Арландар» сапындағы алғашқы кездесуінде жеңіліс тапты.

Екінші болып рингке шыққан команда капитаны Самат Башенов Альберт Селимовтың мықты екенін бірден-ақ мойындады. Әзірбайжан боксшысы қорғаныста жүріп, қарсыласын оңтайлы сәттерде дөп соққыларымен күтіп алумен болды. Бес раунд та Альберттің айқын басымдылығымен өтті.

«Astana Arlans» сапындағы екінші кездесуіне шыққан Мейірім Нұрсұлтанов Йокхан Рамашкевичпен тәп-тәуір жұдырықтасты. Жерлесіміздің басымдығы байқалып-ақ тұрды. Дегенмен төрешілер жеңісті шаршы алаң иелерінің еншісіне жазды.

Төртінші болып жұдырықтасқан «Astana Arlans» легионері Эхсан Рузбахани қарсыласы Рамазан Магомедовты екінші раундта-ақ сұлатып салды. Төрешілер үшін жеңістің осы түрі ғана біздің еншімізге саналды.

Соңғы болып шаршы алаңға көтерілген ауыр салмақтағы тәжірибелі Руслан Мырсатаевтың Хаджи Муртузалиевке шамасы жетпеді. Осылайша есеп 4:1 есебімен «Baku Fires» пайдасына шешілді. Әзірбайжандық команда Алматыда кеткен есесін қайтарды. 

Автор: Өмірбек Сансызбай

Сурет: vk.com